دمعة حزن سالت

قلت ليها

وإيدى فى أيديها

دمعة حزن سالت ..

جاى منك ... وماشى ليك

يا مداين غربة طالت

لو مدارات نجمى ضلت ..

وسكة السفر استحالت ..

كونى فى دربى الحقيقة

الديمة ليها مشاعرى مالت..

قلت ليها ..

وكنت راجع لى عينيها

من أسى الزمن المسافر فى المشاوير .. العصيبة

من متاهات الأمانى

فى مدار الحسن ضماها وحبيبه ..

بينى لا بينك مزار ..

لا محطات إنتظار ..

لا مواعيدك قريبة

إنتى يا الفرح .. الحقيقة المستحيل ..

هدهدي الصبر الجميل

وأمسحى الألم المخيم ..

فى المدارات الرحيبة

قلت ليها

الحقيقة الضايعة

بين .. قلبى وعيونك

أنى لا قادر أفوتك لا أجيك

وأنى ما عارف بدونك ..

أبقى كلمة حب

تزف البشرى فى ساعة مجيك

وأنتى عارفة .. وقلت ليك

يانى أكثر زول بريدك ...

يانى صفوة عاشقيك ..

يانى راكز الخيل عليك

ولسه بى حبك متيم ومبتلى

ألا ريدك زادنى حيرة .. على العلى

لا مراكب البشرى ختن

.. قلبى عندك

وإنتى لاقلبك

نسانى

ولا عليـــــــك